Audio story AfriSound audio
Mwanamke Wa Mithali
Msikilizaji wangu, hii ni episode ya mwisho. Karibu tufunge safari yetu pamoja. Mbeya, mtaa wa Mwanjelwa, watu walisimama kimya wakitazama tukio lile la ajabu. Mwanamke mzee mwembamba alikuwa amepiga magoti mbele ya binti mchanga mwenye cherehani mkononi. Neema alibaki ameganda. Moyo wake ulirudi nyuma kwa miaka mingi: kofi za usiku, ndoo za maji, pete ya uongo, usiku wa mvua ya mlimani. Maumivu yote yalirudi kwa sekunde moja. Lakini kisha alikumbuka sauti ya mama yake: "Wema hata kama hakuna anayekuona." Alipiga hatua taratibu, akamshika Mama Rehema mabegani, akamwinua. "Simama, mama." "Siwezi," alilia Mama Rehema. "Nimekutendea maovu mengi mno. Nimekudhulumu, nimekudanganya, nimekutuhumu bila haki. Mimi ni mwanamke mbaya." Neema alimwongoza ndani ya duka, akamkalisha kwenye kiti, akamletea maji. Watu waliendelea kutazama kwa mshangao kupitia dirishani. "Niambie, mama. Kwa nini umekuja?" Mama Rehema alifuta machozi yake kwa kitambaa kichafu. Alisimulia kila kitu kwa sauti ya kusikitisha. Jinsi mali ilivyoisha, jinsi wosia wa Mzee Josephat ulivyogunduliwa, jinsi Zawadi alivyoolewa na mwanaume mlevi na akaachwa na mtoto mmoja. Jinsi alivyoishia kuishi katika kibanda kimoja cha udongo, mgonjwa, bila msaada. "Nimegundua," alisema akitetemeka, "kwamba nilikuwa nikijenga nyumba yangu juu ya mchanga. Nimekuja si kuomba pesa. Nimekuja kuomba msamaha tu, kabla sijafa." Kimya kikubwa kilitanda.
The listening order